रवि लामिछानेले आफू दोषी हैन भन्दै हिँड्न मिल्दैन: कांग्रेस नेता महत

काठमाडौं । नेपाली कांग्रेसका सांसद प्रकाशशरण महतले राष्ट्रिय स्वतन्त्र पार्टी (रास्वपा)का सभापति रवि लामिछानेले आफू दोषी हैन भन्दै हिँड्न नमिल्ने बताएका छन् । सोमबार प्रतिनिधिसभा बैठकपछि संसद् भवन परिसरमा पत्रकारसँग कुरा गर्दै उनले यस्तो बताएका हुन् ।

प्रवक्ता महतले गोर्खा मिडिया प्रालिले ८५ करोड रुपैयाँ सहकारीबाट ल्याएको छानबिन समितिले बताइसकेको उल्लेख गरे । उनले गोर्खा मिडिया सहकारी संस्थाको सदस्य नभइ पैसा ल्याएको बताउँदै सहकारीबाट ल्याएको पैसाले तलब खुवाएको प्रमाणित भइसकेको जिकिर गरे । उनले भने, “गोर्खा मिडिया प्रालिले ८५ करोड रुपैयाँ सहकारीबाट ल्याएको छ । अन्यबाट ल्याएको छैन भनेर सभापति सूर्य थापाले भन्नुभयो । गोर्खा मिडिया नै सहकारीबाट चलेको रैछ भनेर भनिसक्नुभयो नि ।”

प्रवक्ता महतले लिनै नहुने पैसा सहकारीबाट लिएको बताए । उनले लामिछाने नै जिम्मेवार पदमा रहँदा पैसा खाएको खुलेको बताउँदै अझै पनि निर्धक्क भएर दोषी छैनौँ भन्दै हिँड्नु गैरजिम्मेवार रहेको जिकिर गरे ।

प्रवक्ता महतले भने, “सबै तलब भत्ता सहकारीकै पैसाबाट चलाएको रहेछ । उहाँ त्यहाँको जिम्मेवार पदमा रहँदा पनि पैसा आएको छ । लिनै नहुने पैसा लिएर उहाँले सञ्चालन गर्नुभएको छ । त्यत्ति हुँदा हुँदै पनि निर्धक्क भएर हामी दोषी हुँदै होइनौँ भनेर हिँड्नुभएको छ । त्योभन्दा गैरजिम्मेवारी केही हुँदैन ।”